Føroyar væl umboðaðar á Cruise Europe ráðstevnu

Ólavur Í Geil
55 minutes ago
1 min read

Føroyar vóru væl umboðaðar á árliga aðalfundinum og ráðstevnuni hjá Cruise Europe, sum í ár var hildin í Reykjavík í Íslandi.

Cruise Europe savnar havnir og ferðavinnustøðir úr fleiri londum, og Føroyar eru ein virkin partur av samstarvinum. Á ráðstevnuni varð dentur lagdur á samstarv, burðardygd og framtíðar menning í cruise‑vinnuni.

Millum luttakararnar var Annfinn Hjelm, sum legði fram arbeiðið við Environmental Port Index (EPI). Sambært honum er vaksandi áhugi í vinnuni fyri skipaðari umhvørvisskráseting.

– Tað sæst, at áhugin fyri álítandi dátum og umhvørvisfrágreiðingum er vaksandi, og at hetta hevur týdning fyri bæði havnir og ferðavinnu, sigur Annfinn Hjelm.

Eisini luttók Port of Vágur á ráðstevnuni. Sambært umboðum fyri havnina eru slík tiltøk týdningarmikil, tá tað ræður um at fáa nýggja vitan og styrkja samstarv við aðrar aktørar í vinnuni.

Ráðstevnan gevur eisini møguleika at skapa nýggj sambond og vísa fram møguleikarnar, sum eru í føroysku havnunum, herundir í Vági.

Við virknari luttøku í altjóða samstarvi sum Cruise Europe, arbeiða føroyskar havnir og ferðavinnuveitarar víðari við at menna støðu sína sum ferðamál hjá cruise‑skipum.

(Mynd 📸 Annfinn Hjelm)