Nýtt vakstrarskeið í offshore-vinnuni kann skapa tørv á fleiri skipum

Eva Andrésen
4 hours ago
2 min read

Alt bendir á, at offshore-vinnan stendur framman fyri einum nýggjum vakstrarskeiði. Eftir nógv ár við lágum íløgum í nýggj skip og ein alsamt eldri heimsflota, peika fleiri greiningar nú á, at eftirspurningurin eftir offshore-skipum kann gerast størri enn útboðið komandi árini.

Sama niðurstøða sæst eisini í einari nýggjari grein hjá ShippingWatch, har ein analytikari metir, at reiðarí, sum megna at tryggja sær fleiri skip longu nú, kunnu koma at standa sera væl á framtíðar offshore-marknaðinum.

Ein aldrandi offshore-floti

Sambært greining hjá Westwood Energy er meira enn helvtin av heimsins offshore-supportskipum eldri enn 15 ár. Samstundis eru fá nýggj skip komin inn á marknaðin samanborið við tíðina áðrenn olju- og offshore-kreppuna.

Westwood vísir á, at marknaðurin í dag ikki longur hevur sama stóra yvirkapasitet sum fyrr. Tvørturímóti er talið av skipum, sum kunnu takast inn aftur í rakstur, minkað nógv, meðan tørvurin á skipum støðugt veksur.

Vindorka broytir myndina

Eitt av teimum mest áhugaverdu eyðkennunum við dagsins offshore-marknaði er, at vøksturin ikki einans kemur frá olju- og gassvinnuni.

Offshore Magazine vísir á, at stórar íløgur í havvind mynda ein týðandi part av framtíðar eftirspurninginum. Nýggjar vindmyllulundir kring Evropa krevja serútgjørd skip til uppseting, viðlíkahald, eftirlit og logistikk. Samstundis halda stórar olju- og gassverkætlanir fram í økjum sum Guyana, Brasil og Namibia, har tørvur er á bæði forsyningarskipum, sleiparum og øðrum offshore-eindum.

Tað merkir, at offshore-marknaðurin nú hevur fleiri bein at standa á enn áður, og tað ger framtíðarútlitini meira støðug enn í teimum mest oljuavhengdu tíðarskeiðunum.

Møguleikar fyri Føroyar

Fyri føroyska maritima vinnu kann gongdin fáa serligan týdning.

Føroyar hava í áratíggju bygt upp førleikar innan offshore-tænastur, sleiping, logistikk og sjóvinnu, og føroysk reiðarí hava longu royndir frá arbeiði í Norðurhøvum.

Um spádómarnir hjá marknaðargreinarum halda, kunnu komandi árini gerast ein gyltur møguleiki hjá teimum fyritøkum, sum eru til reiðar at vaksa. Serliga kunnu eigarar av offshore-førum fáa ágóðan av hægri daggjøldum og vaksandi eftirspurningi eftir tænastum.

Westwood Energy væntar nevniliga, at nýtslustigið hjá offshore-supportskipum fer at halda fram við at vaksa bæði í 2026 og 2027. Við vøkstrinum plagar eisini at grundarlag verða fyri størri íløgum og sterkari inntøkum hjá reiðaríunum.

Tíðin at hugsa fram ímóti

Stóri spurningurin er tí, um offshore-vinnan stendur á gáttini til eitt nýtt tíðarskeið, har ov fá skip eru tøk til ein vaksandi marknað.

Tað er í øllum førum tann niðurstøðan, sum fleiri altjóða marknaðargreinar nú draga.

Boðskapurin er greiður: tey reiðarí og lond, sum megna at fyrireika seg nú, kunnu verða tey, sum standa sterkast, tá næsta stóra offshore-uppgongdin veruliga tekur dik á seg

(Mynd: Wix)

Tíðindabræv

Trýst á knøttin og melda teg til okkara tíðindabræv