Íslendskir sjómenn vitjaðu Føroyar í hugnaligari nostalgiferð

Eva Andrésen
5 minutes ago
1 min read

Um Hvítusunnuna hevði ein serligur íslendskur bólkur vitjan í Føroyum, har ein ferðaleiðari var við teimum á ferðini kring landið.

Talan var um 35 sjómenn úr Akureyri, sum allir hava siglt við kendu Stellubátunum úr Klaksvík, ið vórðu seldir úr Føroyum til Íslands í 1974.

Ferðin gjørdist tískil meira enn ein vanlig vitjan – hon var ein hugnalig og nostalgisk afturvendan til eina felags sjóvinnusøgu millum Føroyar og Ísland.

Á skránni vóru fleiri vitjanir kring landið, har serligur dentur varð lagdur á staðir við søguligari og vinnuligari týdning.

Millum hæddarpunktini var vitjanin í Klaksvík og Fuglafirði. Í Klaksvík vitjaðu íslendsku sjómenninir býráðshúsið, har nógv fólk hevði leitað sær saman fyri at taka ímóti teimum.

Her gjørdist stemningurin serliga góður, tá sjómenninir eisini framførdu nakrar sangir, sum settu ein persónligan og hátíðarligan dám á løtuna.

Leiðari fyri bólkin var hin væl kendi Vigfús Helgason, vanliga nevndur Fúsi Helga.

Føroyski ferðaleiðarin var hin viðagitna Maigun Solmunde.

Ferðin varð mett sum bæði gevandi og hugnalig, har søgur, mentan og sjóvinnuarvur vórðu deild tvørtur um lond, og hon staðfesti enn einaferð tey tøttu bondini millum føroyska og íslendska sjóvinnu.

(Myndir Maigun Solmunde)

Tíðindabræv

Trýst á knøttin og melda teg til okkara tíðindabræv