Maersk og Hapag-Lloyd leggja IMX-tænastuna um til Reyðahavið

Eva Andrésen
3 minutes ago
1 min read

(Mynd 📸 Arkiv mynd)

Maersk og Hapag-Lloyd hava avgjørt at broyta siglingarleiðina hjá IMX-tænastuni í Gemini-samstarvinum, so skipini aftur sigla ígjøgnum Reyðahavið og Suez-rásina. Allar siglingar verða framdar við hernaðarligari sjóvernd.

Tænastan, ið talan er um, er IMX‑leiðin, sum bindur India og Miðeystur saman við Miðjarðarhavinum. Frá miðjum februar verða broytingar settar í verk á vestferð frá skipinum “Albert Maersk” og á eystferð frá skipinum “Astrid Maersk".

Maersk og Hapag-Lloyd kanna samstundis møguleikan at leggja eisini SE1- og SE3-tænasturnar – sum eru partur av eystur–vestur gáttaskipnetverkinum í Gemini-samstarvinum – um somu leið á einum seinni tíðspunkti. Í løtuni eru ongar aðrar broytingar í Gemini-netverkinum fyriskipaðar.

Gemini-samstarvið varð sett í verk 1. februar 2025 og er eitt samstarv millum Maersk og Hapag-Lloyd. Netverkið fevnir um 29 felags høvuðstænastur og 29 shuttle-tænastur, og dentur verður lagdur á halda tíðarfreistir (time accuracy) og álítandi siglingar á heimsins týdningarmiklastu handilsleiðum.

Trygdin hjá manning, skipum og farmi hevur hægstu raðfesting, og feløgini fylgja tætt við trygdarstøðuni í økinum.