Norðurleiðin fær størri týdning: Fyrsta kinesiska bingjuskipið komið til Murmansk

Eva Andrésen
1 day ago
2 min read

Murmansk-havnin í Russlandi hevur fyri fyrstu ferð móttikið bingjulast úr Kina, sum er flutt um Norðurleiðina (Northern Sea Route). Hendingin verður mett sum enn eitt týðandi fet í menningini av arktisku siglingarleiðini, ið knýtir Asia og Evropa tættari saman gjøgnum Arktis.

Skipið Xin Xin Hai 1, sum verður rikið av kinesiska reiðarínum NewNew Shipping Line (NNSL), kom til Murmansk við umleið 500 bingjum, ið vóru lastaðar við lutum til bilídnaðin. Skipið fór úr Tianjin í Kina í juli og sigldi gjøgnum arktisku farleiðina til russisku havnina.

Sambært Murmansk Commercial Sea Port er hetta fyrstu ferð, at havnin hevur handfarið bingjulast, ið er komin um Norðurleiðina. Tískil verður henda siglingin sædd sum eitt týðandi stig í arbeiðinum at menna Murmansk sum eitt logistiskt knútapunkt í Arktis.

Kina satsar upp á arktiska sigling

NewNew Shipping hevur seinastu árini økt um virksemið í Arktis. Felagið royndi fyrstu ferð leiðina í 2023 og hevur síðani sett á stovn regluligar siglingar millum kinesiskar havnir og norðurrussisk øki.

Felagið hevur eisini boðað frá, at tað hevur áhuga í at luttaka í menning og dagføring av havna- og logistiskari infrastruktur langs Norðurleiðina. Serligur dentur verður lagdur á havnirnar í Murmansk og Arkhangelsk, sum verða mettar at hava stóran týdning fyri framtíðar arktiska farmaflutningin.

Fleiri skip á leiðini

Í ár ætlar NewNew Shipping at nýta trý skip á Norðurleiðini. Umframt Xin Xin Hai 1 skulu systurskipið Xin Xin Hai 2 og størri skipið NewNew Polar Bear eisini røkja siglingar millum Kina og Russland.

Langtíðarætlanin hjá reiðarínum er at flyta upp til 1,2 milliónir tons av farmi um Arktis í summarsesongini 2027. Til tað endamálið ætlar felagið at útbyggja flotan við fleiri ísflokkaðum bingjuskipum og at økja siglingartalið millum Asia og norðurevropeiskar havnir.

Áhugaverd menning fyri Norðuratlantshavið

Vøksturin í ferðsluni um Norðurleiðina verður fylgdur við stórum áhuga í maritimu vinnuni kring Norðuratlantshavið. Um farmamongdirnar halda fram at vaksa, kann tað skapa nýggjar møguleikar fyri havnir, logistikkveitarar og tænastufyritøkur í økinum.

Hóast sigling í Arktis framvegis er árstíðarbundin og krevur serligar førleikar og skip, vísir nýggjasta siglingin til Murmansk, at Norðurleiðin spakuliga styrkir sína støðu sum ein møguligur og vaksandi handilsvegur millum Asia og Evropa.