Danske Rederier leggja fram nýggja strategi

Ólavur Í Geil
3 days ago
2 min read

Danske Rederier hava lagt fram eina nýggja strategi, sum skal styrkja Danmark og danska flaggið sum heimstað fyri donsk reiðarí. Eitt av høvuðsmálunum er, at handilsflotin undir donskum flaggi skal vaksa minst líka nógv sum – ella meira enn – altjóða handilsflotin.

Sjóvinna er ein kvik vinna, og donsk reiðarí hava víst seg at vera serliga dugnalig at laga seg eftir broyttum handilsmynstrum á heimsmarknaðinum og einum óstøðugum geopolitiskum veruleika. Sambært Danske Rederier er donska shippingvinnan eitt strategiskt virði og ein styrkipositión í eini ófriðarligari tíð, har veitingartrygd og robustheit hava fingið hægstu raðfesting.

– Donska shippingvinnan er eitt strategiskt tilfeingi í eini turbulenta verð, har trygdar- og veitingarspurningar eru komin ovarst á politisku dagskránna, sigur Anne H. Steffensen, forstjóri í Danske Rederier.

Fýra høvuðsmál í strategini

Yvirskipað hevur nýggja strategiin til endamáls at:

styrkja Danmark og danska flaggið sum heimstað fyri donsk reiðarí
tryggja, at førleikarnir hjá donskum sjófólki eru í heimsflokki
fremja grøna umstillingina av shippingvinnuni við óskerdum ambitiónsstigi
tryggja, at donsk reiðarí hava eina strategiska leiklut í verju- og kreppubúskap

Danske Rederier leggja dent á at arbeiða fyri kappingarførum treytum bæði innanlands og altjóða, samstundis sum vinnan skal mennast burðardygt.

– Vit eru bundin at arbeiða fyri kappingarførum karmum og at fremja eina burðardygga og kappingarføra grøna umstilling av altjóða shipping, millum annað við at skala upp framleiðsluna av alternativum brennievnum og nýggjari tøkni. Tað krevur maritimar førleikar í heimsflokki, sigur Anne H. Steffensen.

Greið mál fram móti 2030

Strategiin setur eisini fram fleiri ítøkilig mál og leiðarvísar. Millum annað er málið:

at handilsflotin undir donskum flaggi veksur minst líka nógv sum heimsflotin
at talið á donskum sjófólkum í 2030 er hægri enn í 2025
at minst 400 praktikpláss verða veitt árliga, og at talið á næmingum á maritimum útbúgvingum veksur hvørt ár fram móti 2030
at altjóða reguleringsskipanir verða settar í verk, sum kunnu skunda undir grøna umstillingina av shippingvinnuni – eisini út um ES

Nýggja strategiin hjá Danske Rederier ber heitið “Charting the Course” og kann lesast á heimasíðuni hjá felagnum.