BFI | TÍÐINDI | Áhugaverda vinnustevnan Faroexpo verður aftur í ár, 20.

Endamálið við Faroexpo er, at seta føroyskar fyritøkur, almennar myndugleikar og teirra virksemi í brennidepilin og at styrkja sambandið millum fyritøkur kring landið, umframt sambandið við útlendskar fyritøkur.

(Mynd 📸 vrg)

Faroexpo vinnustevnan, ið er annaðhvørt ár, verður aftur í ár hildin í Runavík, 20. – 22. mai 2025.

Vinnufundir

Út frá ynskjum frá fyritøkum, planleggur leiðslan fyri Faroexpo vinnufundir, har fyritøkur møtast, og soleiðis spyrjast munagóð úrslit burturúr. Heilt konkret hava fleiri fyritøkur gjøgnum árini soleiðis funnið sær samstarvsfelagar, undirveitarar og onnur óformlig sambond. Í ár eru eisini útlendskar fiski- og alifyritøkur við, fyri at kanna hvat føroyskar fyritøkur kunnu bjóða.

Vinnustevnan er tó ikki bert fyri fiskivinnuna. Luttøkan undanfarnu árini hevur vanliga ligið frá 50 til 70 luttakandi fyritøkur, har flestu vinnugreinar hava verið umboðaðar. Eftir nærum 20 ár á baki, er áhugin fyri Faroexpo enn stórur.

Almenn ráðstevna.

Í framhaldi av vinnustevnuni verður almenn ráðstevna hildin. Ráðstevnan hevur verið væl umtókt, tí evnið altíð er áhugavert, og møguleikarnir fyri at netverka eru góðir. Í ár hevur Stýrið í Faroexpo valt evnið “Fríhandil og altjóða avtalur - Hvørjum bíða vit eftir ?”.

VRG skipar fyri vinnustevnuni í samstarvi við Eysturoyar Vinnulívsfelagi og Runavíkar kommunu, sum hevur verið ein aktivur viðspælari líka síðan Faroexpo varð fyriskipað fyrstu ferð í 2005.