MEST | Søkir eftir bedingsmeistara

Eva Andrésen
Oct 1
1 min read

Starvslýsing frá MEST:

Á skipasmiðjunum hjá MEST í Havn og á Skála ganga vit og rokast og hava brúk fyri einum bedingsmeistara, sum vil rokast saman við okkum.

Vit hava brúk fyri tær, sum kann

Stjórna dagligu driftini av dokkum og bedingum og dagligu uppgávunum hjá teimum 22 fólkunum í bedingstoyminum
Standa fyri upphálingum / sjósetingum á bedingunum eins og inn- og útdokkingum
Skjalfesta viðlíkahald av dokk, bedingum og útgerð.
Tú sært til, at alt verður gjørt, sum tað eigur.

Um teg

Tú ert útbúgvin navigatørur, hevur royndir at arbeiða við skipsstøðuleika og viðlíkahaldsskipanum, og tú hevur góðar KT-førleikar.

Tú ert álítandi og fyrikomandi og kanst arbeiða undir trýsti.

Umsóknarfreistin er 22. oktober 2025

Starvið verður sett skjótast tilber, og lønin verður sambært avtalu.

Arbeiðsstaðurin er í Havn, og arbeiðsuppgávurnar eru í Havn og á Skála. Vilt tú vita meira um starvið, ring ella skriva til Dánjal í Soylu á 791231 / djs@mest.fo.

Vit eru MEST

Ein fyritøka á fimm hundrað hegnig fólk, sum hvønn morgun tørna til á føroyskum skipasmiðum og verkstøðum og í frálandavinnuni úti í heimi. Vit smíða og bøta um bátar og skip, tilevna tól úr klingandi stáli, skaffa nýtt fyri slitið og brotið og hiva og sleipa mangt less upp á pláss.

Vit eru í Havn, Runavík og á Skála, og hevur tú hug og hendur, kanst tú koma við.

(Photos 📸 Mest)

Tíðindabræv

Trýst á knøttin og melda teg til okkara tíðindabræv