Politikari spyr hví ikki er lýst eftir nýggjum leiðara til Sjónám

Ólavur Í Geil
6 minutes ago
2 min read

Ein skrivligur fyrispurningur er nú latin landsstýrismanninum í mentamálum, Bárði á Lakjuni, sum setur fokus á støðuna og framtíðarætlanirnar hjá Sjónámi. Tað er løgtingsmaðurin Hermann R. Samuelsen, sum hevur reist málið í Løgtinginum eftir § 52a í Tingskipanini.

Í fyrispurninginum verða tríggir týdningarmiklir spurningar settir: Hví er enn ikki lýst eftir nýggjum leiðara til Sjónám, um ætlanin er at seta ein nýggjan leiðara, og hvørjar ítøkiligar visjónir landsstýrismaðurin hevur fyri framtíðina hjá stovninum.

Sjónám hevur eina drúgva søgu og er ein týðandi partur av føroyska maritima útbúgvingarlandslagnum. Stovnurin varð settur á stovn í Klaksvík í 1947 av Fischer Heinesen og hevur síðan tá verið ein hornasteinur í útbúgvingini av fólki til sjóvinnuna.

Í 1974 tók tað almenna yvir raksturin, og síðani tá hevur Sjónám virkað sum ein landsstovnur við uppgávu at bjóða maritimar útbúgvingar – á sama hátt sum Sjóvinnuháskúlin. Hetta hevur givið Føroyum eitt breitt og fjølbroytt útboð innan sjóvinnuútbúgvingar, sum eru avgerandi fyri eitt land við sterkum sjóvinnurøtum.

Bakgrundin fyri fyrispurninginum er, at verandi leiðarin á Sjónámi fyri stuttum hevur lagt frá sær, og ein fyribilsleiðari er settur í starvið. Tað hevur vakt áhuga og undran, at eingin almenn lýsing enn hevur verið eftir nýggjum leiðara.

Sama viðmerking bendir eisini á, at frætt er um møguligar broytingar í útbúgvingunum, sum Sjónám bjóðar. Hetta hevur elvt til spurningar um, hvussu framtíðar leikluturin hjá stovninum fer at síggja út – bæði viðvíkjandi virksemi, bygnaði og samanhangi við aðrar maritimar útbúgvingar.

Fyrispurningurin er samstundis eitt tekin um ein vaksandi áhuga fyri at menna og styrkja maritima útbúgving í Føroyum. Sjónám hevur í áratíggju spælt ein týdningarmiklan leiklut í at útbúgva fakfólk til sjóvinnuna, og hvørjar avgerðir verða tiknar nú, kunnu fáa týdning fyri komandi ættarlið av sjófólki.

Við hesum spurningum verður eisini skapt eitt høvi at kjakast um, hvussu best ber til at tryggja, at føroyskar maritimar útbúgvingar framvegis eru kappingarførar og svara til tørvin í eini altjóða vinnu í støðugari menning.

Nú bíða politikarar og áhugaðir partar eftir svarinum frá landsstýrismanninum. Svørini kunnu geva greiðari mynd av, hvussu landsstýrið sær framtíðina hjá Sjónámi – og hvussu stovnurin kann halda fram at vera ein sterk og týdningarmikil liður í føroysku útbúgvingarskipanini.

(Mynd 📸 BFI)

Tíðindabræv

Trýst á knøttin og melda teg til okkara tíðindabræv