Føroyingar við til handanina av nýggjum offshore-skipi - Norwind

Ólavur Í Geil
33 minutes ago
1 min read

Sirocco varð í hesum døgum handað reiðarínum Norwind Offshore á VARD-skipasmiðjuni í Brattvåg í Noregi.

Skipið er eitt framkomið tænastuskip, sum skal arbeiða innan offshore-vindvinnuna og veita tænastur til vindmyllulundir til havs. Millum tey, sum vóru við til handanina, vóru eisini føroyingar.

Ein teirra er Jógvan Hendrik Sigurstein, sum starvast sum ETO (Electro Technical Officer), og sum deildi myndir frá handanarhátíðini.

Eisini er Eyðfinn Hvidbro úr Klaksvík knýttur at skipinum, har hann starvast sum maskinmeistari.

Henda stórhending staðfestir enn einaferð, at føroysk sjófólk og maritimir serfrøðingar eru væl umboðaðir í altjóða offshore-vinnuni.

Norwind Sirocco er serliga bygdur til arbeiðið í offshore-vindvinnuni. Skipið er útgjørt við framkomnum útbúnaði, millum annað einari sonevndari walk-to-work-skipan, sum ger tað møguligt hjá teknikarum trygt at flyta seg úr skipinum yvir á vindmyllur og aðrar installatiónir á havinum.

Harumframt hevur skipið framkomna DP-stýring og góðar bústaðarumstøður til manning og teknikarar. Handanin av Norwind Sirocco er eitt dømi um stóra virksemið innan grøna orku og offshore-vindvinnu í Norðurhøvum.

Samstundis er tað gleðiligt at síggja, at føroyingar sum Jógvan Hendrik Sigurstein og Eyðfinn Hvidbro eru við í hesum framkomna og altjóða vinnuumhvørvi.